Të hënën, marsh protestues në mbeshtetje të të mbijetuarve të dhunës seksuale

21:19 | 19 Maj 2019

Nesër (e hënë), në orën 12, në sheshin “Zahir Pajaziti”, në Prishtinë, do të mbahet marsh protestues për mbështetjen e të Mbijetuarve të Dhunës Seksuale Gjatë Luftës në Kosovë.

Këtë protestë e ka mbështetur edhe e mbijetuara e dhunës seksuale gjatë luftës në Kosovë, Vasfije Krasniqi, përmes rrjetit social Twitter.

Në një njoftim përmes rrjeteve sociale, Qendra për Rehabilitimin e Viktimave të Torturës (KRCT), ka njoftuar se marshi do të vazhdojë deri para hyrjes së Kuvendit të Kosovës, ku edhe aty do të vendosen pankartat.

“Takimi i pjesëmarrësve do të bëhet në Sheshin Zahir Pajaziti, në ora 12.00, dhe marshi do të vazhdoj deri para hyrjes së Kuvendit të Kosovës. Pjesëmarrësit do të bartin pankartat me mesazhet që kanë dhënë të mbijetuarit e dhunës seksuale gjatë luftës në Kosovë pas publikimit të fotografisë, të cilat mesazhe do të vendosen në hyrjen e Kuvendit të Kosovës”, shkruan KRCT në rrjetin social Facebook.

Motoja e Marshit është “MË TRAJTO DINJITETSHËM”, dhe bëhet thirrje që qytetarët t’i bashkohen këtij marshi solidarizues.

Këtij marshi do t’i bashkohen edhe Rrjeti i Grave të Kosovës dhe shumë organizata të tjera.

“Ky marsh është organizuar në mbështetje të të mbijetuarve të dhunës seksuale gjatë luftës në Kosovë, dhe motoja e marshit është “MË TRAJTO DINJITETSHËM”. Andaj ju lutemi që të na bashkoheni në këtë marsh solidarizuar me të mbijetuarit e dhunës seksuale”, shkruhet në njoftimin në Facebook.

Ky marsh duket se vjen pas skandalit të deputetes së Partisë Demokratike të Kosovës, Flora Brovina, e cila publikoi një fotografi në të cilën, sipas saj, janë pamje të dhunimit të grave shqiptare nga ushtarët serbë.

Në fund doli që kjo fotografi, në fakt ishte marrë nga faqet pornografike.

Shpërndaje në rrjete sociale

Lajmet më të lexuara