Shënohet “Dita e Dëshmorëve në Prizren”

18:17 | 15 Shtator 2020

Për nder të “Ditës së dëshmorëve në Prizren”, sot  kryetari Mytaher Haskuka së bashku me zyrtarët komunalë dhe përfaqësuesit e Organizatës së Veteranëve të Luftës së UÇK-së kanë bërë homazhe tek varrezat e dëshmorëve në Landovicë, si dhe pranë shtatoreve të dëshmorëve të kombit “Ismail Kryeziu”, “Pal Paluca”, “Xhevat Berisha”, “Ismet Jashar Komunova”, dhe tek monumenti i dëshmorit “Remzi Ademaj” në Prizren.

Për nder të kësaj dite, në hapësirat e Lidhjes së Prizrenit, kryetari Haskuka ka bërë shpërndarjen e mirënjohjeve për 22 gra veterane të luftës, që kanë kontribuar për çlirimin e vendit, raporton arbresh.info.

Në një fjalë rasti, kryetari Haskuka deklaroi se në këtë përvjetor po përkujtohen dëshmorët që flijuan jetën e tyre për të realizuar ëndërrat e qytetarëve të Kosovës për të pasur një shtet të lirë e të pavarur.

Pas shpërndarjes së mirënjohjeve, kryetari Haskuka, së bashku me drejtorin e Drejtorisë së Administratës, Osman Hajdari përuruan rifillimin e punimeve për përfundimin e memorialit të heroit të kombit “Besim Nrecaj” në fshatin Malësi të Re.

Punimet për këtë memorial kishin filluar në vitin 2017, duke u lënë pa u përfunduar, kurse tani me projektin e ri, memoriali do të përurohet deri në fund të këtij viti./arbresh.info/

Shpërndaje në rrjete sociale

Lajmet më të lexuara