Kurti takon Sarnez në Francë: Kosova e gatshme për zhvillimin e një partneriteti të ngushtë e strategjik me Francën

21:10 | 7 Nëntor 2019

Kandidati për kryeministër nga Vetëvendosje, Albin Kurti ka takuar në Paris kryetaren e Komisionit për Punë të Jashtme në Asamblenë Nacionale të Francës, Marielle de Sarnez.

Nëpërmjet një shkrimi në Facebook ai ka bërë të ditur se Marielle de Sarnez ka uruar atë për fitoren në zgjedhjet parlamentare.

“Ajo më uroi për fitoren në zgjedhjet e 6 tetorit dhe e theksoi dëshirën dhe nevojën që të thellohen edhe më tej marrëdhëniet bilaterale ndërmjet Francës dhe Kosovës”, ka shkruar ai.

Kurti poashtu ka treguar se gjatë takimit ka njoftuar kryetaren de Sarnes për zhvillimet e fundit në vend dhe rajon si dhe për programin qeverisës.

Postimi tij i plotë:

Sot në Paris, takova Kryetaren e Komisionit për Punë të Jashtme në Asamblenë Nacionale të Francës, znj. Marielle de Sarnez. Ajo më uroi për fitoren në zgjedhjet e 6 tetorit dhe e theksoi dëshirën dhe nevojën që të thellohen edhe më tej marrëdhëniet bilaterale ndërmjet Francës dhe Kosovës.
I shoqëruar nga ambasadori ynë, z. Qëndrim Gashi, e falenderova znj. de Sarnez për ndihmën e rëndësishme që Franca i ka dhënë Kosovës ndër vite, në kohë lufte e paqe, për siguri dhe zhvillim. Nënvizova gatishmërinë e Kosovës për zhvillimin e një partneriteti të ngushtë e strategjik me Francën në fusha me interes reciprok.
Kryetaren de Sarnez e njoftova edhe për zhvillimet në vend dhe rajon si dhe për përgatitjet tona për programin qeverisës që i përgjigjet vullnetit, të drejtave dhe kërkesës së qytetareve për rend e ligj, luftë kundër korrupsionit, zhvillim ekonomik dhe arsim cilësor.

Shpërndaje në rrjete sociale

Lajmet më të lexuara