Krasniqi: Pse disa shqiptarë e kanë frikë bashkimin?

10:15 | 14 Prill 2015

Ish kryeparlamentari Jakup Krasniqi, ka komentuar rreth deklaratës së kryeministrit të Shqipërisë Edi Ramës, në lidhje me bashkimin kombëtar të shqiptarëve.

Krasniqi, në një postim në profilin e tij në facebook, ka shkruar disa nga arsyet pse nuk duhet pasur frikë nga bashkimi i mundshëm i Kosovës me Shqipërinë.

“Nuk është bashkim i dhunshëm.
Nuk formohet Shqipëria e madhe.
Ky bashkim nuk rrezikon asnjë vend.
Ky bashkim do të lironte mjete financiare për zhvillim. Ky popull nuk është kaq i pasur sa ti mbajë dy aparate kaq të mëdha shtetërore”, ka thënë Krasniqi.

Pavarësisht kësaj, Krasniqi është shprehur se nuk mund të beson se Edi Rama e ka seriozisht, për faktin se sipas Krasniqit, bashkimi nuk është çështje e dy a tre individëve, por sipas tij është çështje e një koncenzuesi kombëtar, për të cilin askush nuk është duke punuar.

Më poshtë mund ta lexoni postimin e tij të plotë:

“Kur po i lexoj disa shkrime e opinione kundër Deklaratës se Edi Ramës, menjëherë po me shkon mendja në vitin 1998, kur i pata dhënë zë Betimit te ushtarit të UÇK-së se do të: “Luftojmë për bashkimin e trojeve të pushtuara të Shqipërisë”. Atë botë edhe nga qarqe te caktuara shqiptare, pat një reagim te çuditshëm?!

Krahasuar me deklarimin e Edit, sot përpiqem edhe t’i kuptoj, se pozicioni i atëhershëm krahasuar me sot ishte krejt tjetër. E para, deklarimi ynë e kishte përmbajtjen dhe armën e realizimit – UÇK-në; e dyta frika ndoshta në një masë e kishte edhe arsyen?! Sot po përpiqem t’i kuptoj edhe ata që u frikësuan! Për rastin e tanishëm, frika jo vetëm e shqiptarëve, me duket më shumë se e arsyeshme.

A duhet pasur frikë sot dhe nga kush, kjo është çështja. Frikë duhet pasur nga qëndrimet e pohimet luftënxitëse që vijnë nga ata që i shkaktuan mase tri lufta. Luftëra që shkaktuan një gjenocid të tmerrshëm. Gjenocidin në Kroaci, Bosnje e Hercegovinë e Kosovë i shkaktoj politika agresive e Beogradit.

Pse nuk duhet frikësuar nga bashkimi i Kosovës me Shqipërinë?
Nuk është bashkim i dhunshëm.
Nuk formohet Shqipëria e madhe.
Ky bashkim nuk rrezikon asnjë vend.
Ky bashkim do të lironte mjete financiare për zhvillim. Ky popull nuk është kaq i pasur sa ti mbajë dy aparate kaq të mëdha shtetërore.
Në Ballkanin e trazuar do të krijohej një partneritet në mes shtyllave kryesore të Ballkanit.
Partneriteti mes popujëve të Ballkanit krijon: Siguri, stabilitet dhe zhvillim. A nuk po e synojmë të gjithë zhvillimin?

Por unë, ende nuk mund të besoj se Edi Rama e ka seriozisht. Për faktin se bashkimi nuk është çështje e dy a tre individëve, është çështje e një koncenzuesi kombëtar, për të cilin askush nuk është duke punuar. Ky fakt e bënë edhe më të pa arsyeshme frikën e BE-së dhe te të tjerëve nga “baskimi” i Kosovës me Shqipërinë”. /arbresh.info/

Shpërndaje në rrjete sociale

Lajmet më të lexuara