Ftesa nga Specialja për Veselin, reagon Sami Lushtaku

21:57 | 7 Nëntor 2019

Sami Lushtaku përmes një postimi në Facebook ka komentuar ftesën e Gjykatës Speciale për bashkëluftëtarin e tij, Kadri Veseli.

Ai ka thënë se është i bindur se Veseli dhe të gjithë luftëtarët e ftuar do të dalin me dinjitetin më të lartë njerëzor dhe do ta mbrojnë luftën e pastër të UÇK-së.

Postimi i plotë i Sami Lushtakut:

Kanë kaluar më shumë se 20 vite që nga përfundimi i luftës së lavdishme të Ushtrisë Çlirimtare të Kosovës, e cila i solli lirinë popullit të Kosovës. Ndonëse ka kaluar një kohë e gjatë, themeluesit dhe luftëtarët më të mirë të saj, po vazhdojnë të hetohen nga organe të drejtësisë vendore e ndërkombëtare.

Ftesave të shumta të bëra nga prokuroria e dhomave të specializuara të Gjykatës Speciale, i është shtuar edhe njeri ndër themeluesit e UÇK-së, miku e bashkëluftëtari im, Kadri Veseli.

Duke e njohur për 30 vite me radhë, ai për mua ka qenë dhe mbetet njeri i ndershëm e i drejtë, strateg e luftëtar i denjë i UÇK-së, lider i ndërtimit të paqes dhe shtetit.

Jam i bindur që Kadri Veseli dhe të gjithë luftëtarët që janë ftuar nga këto dhoma të specializuara, me dinjitetin më të lartë njerëzor, do ta mbrojnë luftën e pastër dhe të drejtë të Ushtrisë Çlirimtare të Kosovës.

Shpërndaje në rrjete sociale

Lajmet më të lexuara