Fëmijët pyesin kryeministrin Kurti për fëmijërinë dhe ëndrrat e tij

18:46 | 1 Qershor 2020

Për nder të Ditës Ndërkombëtare të Fëmijëve, kryeministri në detyrë, Albin Kurti, ka takuar nëntëmbëdhjetë fëmijë  të moshave nga 4 deri në 13 vjeçar.

Gjatë këtij takimi, i cili u mbajt në ndërtesën e qeverisë, Kurti u është përgjigjur pyetjeve të shumta të fëmijëve.

Pas përgjigjeve që i kanë dhënë Kurtit, fëmijët pastaj kanë shfrytëzuar mundësinë për t’i drejtuar pyetjet e tyre ndaj kryeministrit.

Ata , ishin të interesuar të dinë më shumë për ëndrrat dhe fëmijërinë e kryeministrit Kurti. Në mesin e këtyre fëmijëve ishte edhe Arsa, vajza e aksitivstit të VV-së, Astrit Dehari, i cili vdiq në Qendrën e Paraburgimit në Prizren në vitin 2016/arbresh.info

Njoftimi i plotë:

Sot, në nder të Ditës Ndërkombëtare të Fëmijëve, nëntëmbëdhjetë fëmijë patën rastin të dëgjohen nga Kryeministri në detyrë, z. Albin Kurti, në ndërtesën e Qeverisë. Dëshira për t’u dëgjuar është më e përhapura nga të gjitha dëshirat tona shoqërore. Secili nga ne duam zëri ynë të dëgjohet, që roli ynë të njihet e kontributi ynë të vlerësohet.

Fëmijët ishin të moshave nga 4 vjeç deri 13 vjeç. Takimi filloi me pyetjet e kryeministrit për fëmijët, kryesisht në lidhje me mësimin në kohë pandemie. Fëmijët u dakorduan me njëri-tjetrin se mësimi në shtëpi ka qenë më sfidues sesa mësimi në shkolla, sepse aty mund të shtjellohen dhe diskutohen temat me mësueset dhe moshatarët. Megjithatë, duke qenë në një situatë të pazakontë, edhe nxënia e mësimit u deshtë të bëhet në një mënyrë të pazakontë, por gjithsesi të suksesshme.

Pastaj, secili nga fëmijët pati mundësi t’i bënte pyetje kryeministrit. Ato ishin nga më të ndryshmet. Nga pyetje për fëmijërinë e kryeministrit dhe ëndrrat e tij si fëmijë dhe këshillat e tij që ai ia jep vajzës së tij, e deri te të drejtat e fëmijëve dhe se çfarë mund të bëjnë ata për të ndihmuar situatën e krijuar nga COVID-19.

Në fund të takimit, kryeministri u uroi atyre 1 Qershorin, derisa stafi i Kabinetit të Kryeministrit ndau për ta disa dhurata, përfshirë libra, fletore dhe kimikë.

 

Lajmet më të lexuara