Aksion i madh i Policisë në Mitrovicë, arrestohen disa policë e qytetarë

08:18 | 28 Maj 2019

Disa zyrtarë policor dhe disa qytetarë janë arrestuar mëngjesin e së martës në Mitrovicën nën dyshimin e pjesëmarrjes në grupin kriminal, kontrabandë me mallra, dhënie e ryshfetit, tregti e ndaluar.

Policia e Kosovës përmes një komunikate për medie ka bërë të ditur se aksioni është realizuar në rajonin e Mitrovicës Veri dhe Mitrovicës Jugu, shkruan arbresh.info,

“Sot, me 28.05.2019 Policia e Kosovës (PK), në bashkëpunim me Inspektoratin Policor të Kosovës (IPK), si dhe nën asistimin e njësiteve tjera relevante në zbatim të urdhëresës së Gjykatës Themelore Prishtinë, po realizohet një operacion i cili ka rezultuar me ndalimin  e disa zyrtarëve policor dhe disa qytetarëve. Këtij operacioni policor i ka paraprirë një hetim disa mujor i IPK-së, PK-së i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtareve policor dhe të disa qytetarëve në; “Pjesëmarrje ose Organizim i Grupit Kriminal”, në lidhje me veprat tjera penale si; “Kontrabandim me Mallra”, “Keqpërdorim i Pozitës Zyrtare”, “Dhënie e Ryshfetit”, “Tregti e Ndaluar” etj”, thuhet në njoftimin e PK-së.

Gjithashtu Policia ka njoftuar se në Veri të Mitrovicës ka hasur në rezistencë të armatosur ndërsa aksioni është duke vazhduar.

“Edhe përkundër hasjes në rezistencë të armatosur në Veri të Mitrovicës, operacioni policor është duke vazhduar,  përfshirë arrestimin dhe kontrollin e disa lokacioneve të cilat kanë rezultuar me konfiskimin e dëshmive relevante përfshirë edhe armë të gjata. Policia e Kosovës, në bashkëpunim me organet e drejtësisë, Inspektoratin Policor mbeten të përkushtuara në realizimin e detyrave dhe përgjegjësive të saj ligjore, me qëllim të ruajtjes së rendit dhe qetësisë publike, parandalimit të veprimtarive të kundërligjshme, pa marrë parasysh përfshirjen e personave  në raste të tilla penale”, thuhet në komunikatën e Policia.

Gjithashtu Policia ka njoftuar se gjatë ditës do të jap më shumë detaje rreth aksionit./Arbresh.info/

 

Shpërndaje në rrjete sociale

Lajmet më të lexuara