Regjimi sirian sulmon Idlibin në kohë syfyri, 3 të vdekur

11:28 | 15 Maj 2019

Të paktën tre civilë kanë humbur jetën dhe shtatë të tjerë janë plagosur nga një sulm i forcave të regjimit sirian ndaj vendbanimeve brenda zonës së deeskalimit të Idlibit në kohë të syfyrit, raporton Anadolu Agency (AA).

Sipas burimeve lokale, sulmi me artileri dhe raketa i forcave të regjimit, të mbështetura nga grupet e huaja terroriste që kanë përkrahjen e Iranit, ka ndodhur në fshatin Kefer Dael në perëndim të Halepit, që është pjesë e zonës së deeskalimit të Idlibit.

Mbrojtja Civile, e njohur si Helmetat e Bardha, njoftuan se tre persona kanë humbur jetën dhe shtatë janë plagosur si pasojë e sulmit.

Ndryshe, sipas Helmetave të Bardha, të paktën 140 civilë kanë humbur jetën dhe 375 të tjerë janë plagosur që nga 25 prilli.

Opozitarët ushtarakë, garantues i të cilëve është Turqia në kuadër të marrëveshjes historike të arritur më 4-5 maj 2017 në Astana në të cilën Idlibi the rrethina u shpallën zonë e deeskalimit, më 17 shtator të vitit 2018 tërhoqën armët e tyre të rënda si rezultat i një marrëveshjeje tjetër midis Turqisë dhe Rusisë në Soçi.

Megjithatë, forcat e regjimit vazhdojnë pa ndërprerë sulmet e tyre pavarësisht marrëveshjes së Soçit mes Turqisë dhe Rusisë, e cila kishte për qëllim të forcojë armëpushimin në Idlib. Në kuadër të Marrëveshjes së Astanas, Rusia është vendi garantues i regjimit të Asadit.

Sulmet e fundit të regjimit dhe mbështetësve të tij u intensifikuan teksa më 25-26 prill, në kryeqytetin e Kazakistanit, Nursultan, po mbahej takimi i 12-të midis Turqisë, Rusisë dhe Iranit.

Shpërndaje në rrjete sociale

Lajmet më të lexuara