OKB: Ndihmat humanitare për 1 milionë të shpërngulur në Idlib shkojnë nga Turqia

13:03 | 14 Maj 2020

Kombet e Bashkuara njoftuan të martën se në Siri janë regjistruar raste me COVID-19, se rreth 8.000.000 civilë në shkallë vendi përballen me pasiguri ushqimore dhe se ndihmat humanitare për gati 1.000.000 të shpërngulur në Idlib shkojnë nga Turqia, transmeton arbresh.info.

Elisabeth Byrs, zëdhënëse kryesore e Programit Botëror të Ushqimit (PBU/WFP), një prej agjencive më të rëndësishme të OKB-së, mbajti një videokonferencë shtypi në zyrën e organizatës në Gjenevë.

“Afro 940.000 njerëz në veriperëndim të Sirisë janë shpërngulur për shkak të konflikteve që nga dhjetori i vitit 2019. Tani ata jetojnë në kampe të mbipopulluara, ku COVID-19 mund të shkaktojë pasoja shkatërruese”, paralajmëroi Byrs duke tërhequr vëmendjen sidomos mbi dramën humanitare në Idlib.

Sipas zyrtares së PBU-së, pandemia e koronavirusit të ri ka mbërritur edhe në Siri, por ende nuk kanë parë ndonjë masë për ta vënë atë nën kontroll.

Edhe pse Qendra Kërkimore e Koronavirusit në Universitetin “John Hopkins” të Shteteve të Bashkuara të Amerikës dhe uebfaqja “Worldometer”, dy prej referencave kryesore për statistikat e pandemisë globale, bëjnë me dije 47 raste të konfirmuara në Siri, Elisabeth Byrs nuk përmendi asnjë shifër për këtë vend.

Nga ana tjetër, zëdhënësja tha se rreth 8 milionë civilë në Siri përballen me pasiguri ushqimore dhe se PBU-ja po bën ç’është e mundur për të mbërritur tek personat në nevojë.

Ajo vuri në pah se PBU-ja dhe partnerët e saj kanë siguruar ndihma ushqimore jetike për 1.700.000 njerëz në veriperëndim të Sirisë gjatë muajit mars.

“Vazhdimi i ndihmave ushqimore të PBU-së nga Turqia nëpërmjet operacioneve ndërkufitare të saj ka rëndësi jetike. Sepse është shumë e rëndësishme t’i mbash njerëzit të fortë dhe të ndërtosh sistemin e tyre imunitar (kundër virusit)”, vlerësoi Byrs.

OKB-ja dërgoi në Idlit të Sirisë edhe të hënën 45 mauna me ndihma humanitare. Maunat e ngarkuara me ndihmat e Kombeve të Bashkuara kaluan nga Pika Kufitare Cilvegozu në qytezën Reyhanli të rrethit Hatay, në kufirin e Turqisë me Sirinë./arbresh.info/

 

 

Lajmet më të lexuara