OBI dënon sulmet e Armenisë ndaj Azerbajxhanit

23:53 | 28 Shtator 2020

Organizata e Bashkëpunimit Islamik (OBI) dënoi sot sulmin e Armenisë ndaj Azerbajxhanit dhe bëri thirrje për një zgjidhje politike të konfliktit midis dy vendeve, transmeton Anadolu Agency (AA).

“Ndërsa OBI dënon fuqishëm provokimet dhe agresionin e përsëritur nga forcat ushtarake të Republikës së Armenisë, përsërit solidaritetin e saj me Republikën e Azerbajxhanit dhe kujton rezolutat dhe vendimet përkatëse të OBI-t dhe Këshillit të Sigurimit të Kombeve të Bashkuara”, thuhet në njoftimin e OBI-t.

Nga organizata thanë se po monitorojnë me shqetësim të thellë agresionin e Armenisë duke shënjestruar disa lokacione fqinjin e saj lindor dhe “shkeljen e armëpushimit dhe shkaktimin e viktimave civile”.

“OBI bën thirrje për tërheqjen e plotë dhe të pakushtëzuar të forcave armene nga territoret e okupuara të Azerbajxhanit dhe për dialog për të arritur një zgjidhje politike të konfliktit midis dy vendeve bazuar në respektimin e sovranitetit dhe integritetit territorial të Republikës së Azerbajxhanit, si dhe paprekshmërisë së kufijve të saj të njohur ndërkombëtarisht”, thuhet gjithashtu në njoftim.

Sekretariati i Përgjithshëm i OBI-t shprehu ngushëllime për familjet e dëshmorëve, si dhe qeverinë dhe popullin e Azerbajxhanit, duke u uruar të plagosurve një shërim të shpejtë.

Konflikti i Malësisë së Karabakut

Përleshjet kufitare shpërthyen dje në mëngjes kur forcat armene shënjestruan vendbanimet civile të Azerbajxhanit dhe pozicionet ushtarake në rajonin e okupuar.

Parlamenti i Azerbajxhanit shpalli një gjendje lufte në disa qytete dhe rajone të tij pas shkeljeve kufitare të Armenisë dhe sulmeve në rajonin e okupuar të Malësisë së Karabakut.

Marrëdhëniet midis dy ish-shteteve sovjetike kanë qenë të tensionuara që nga viti 1991, kur ushtria armene pushtoi Malësinë e Karabakut, një territor i njohur ndërkombëtarisht i Azerbajxhanit.

Katër rezoluta të Këshillit të Sigurimit të OKB-së dhe dy rezoluta të Asamblesë së Përgjithshme të OKB-së, si dhe shumë organizata ndërkombëtare, kërkojnë tërheqjen e forcave pushtuese.

Grupi i Minskut i OSBE-së, i bashkë-kryesuar nga Franca, Rusia dhe SHBA, u formua në vitin 1992 për të gjetur një zgjidhje paqësore të konfliktit, por pa rezultat. Megjithatë, një armëpushim u dakordua në vitin 1994.

Franca, Rusia dhe NATO, mes tjerash, kanë kërkuar ndalje të menjëhershme të përleshjeve në rajonin e okupuar.

 

Lajmet më të lexuara