Kërkesë për arrestimin e peshkopit katolik

20:35 | 22 Nëntor 2019

Prokurorja e çështjeve penale në Argjentinë ka kërkuar arrestimin e peshkopit Gustavo Zanchetta, i cili aktualisht jeton në Vatikan në Domus Santa Marta, në hotelin e njëjtë në të cilin banon Papa Françesku, transmeton Anadolu Agency (AA).

Sipas Agjencisë Katolike të Lajmeve (CNA), Zanchetta akuzohet për abuzim seksual të dy seminaristëve dhe mund të përballet me tre deri në 10 vjet burg nëse dënohet.

I akuzuar penalisht në qershor, Zanchetta gjithashtu u pezullua nga posti në bankën qendrore të Vatikanit, ku u emërua një “vlerësues” nga Papa Françesku në vitin 2017.

Siç raportojnë mediat lokale, Maria Soledad Filtrin Cuezzo, një prokurore e krimeve seksuale në Oran, qytet në provincën veriperëndimore Salta, ka kërkuar ndihmë ndërkombëtare për arrestimin e Zanchetta, sepse peshkopi nuk u është përgjigjur thirrjeve të përsëritura telefonike ose postave elektronike.

Megjithë përpjekjet e Cuezzo për ta sjellë atë në vend, Zanchetta u lejua të largohej nga vendi, sipas El Tribuno, pasi ai paraqiti një dokument që tregon se ai është një punonjës i Vatikanit.

Zanchetta dyshohet se ka dërguar selfie të qarta seksuale nga telefoni i tij celular, duke ngacmuar seminaristët dhe ka keqmenaxhuar financat e Dioqezës së Oran, të cilën ai e drejtoi nga viti 2014 deri në dorëheqjen e tij në vitin 2017, duke përmendur arsye shëndetësore.

Por vetëm disa muaj pas mbërritjes së tij në Vatikan, Papa Françesku, një argjentinas, e promovoi atë në një pozicion të krijuar rishtas që mbikëqyr pasuritë dhe pronat e pasurive të patundshme të Vatikanit.

Sipas një raporti të El Tribuno në shkurt, një nga sekretarët e peshkopit njoftoi autoritetet pasi rastësisht gjeti imazhe të qarta seksuale të dërguara dhe të marra në celularin e Zanchetta-s në vitin 2015.

Në mbrojtjen e tij, Zanchetta pretendoi se telefoni dhe kompjuteri i tij ishin hakuar, gjë që mjaftoi për të bindur Papa Françeskun që e thirri Zanchetta-n në Romë për pesë ditë në tetor 2015 dhe hodhi poshtë pretendimet.

Megjithatë, nën presion, Papa tha në janar se Kongregacioni për Doktrinën e Besimit tani po heton Zanchetta-n.

Sipas CNA-së, mbetet për t’u parë nëse peshkopi do të kapet në Vatikan dhe do të ekstradohet në Argjentinë.

Shpërndaje në rrjete sociale

Lajmet më të lexuara