Ende nuk dihet kur do të filloj rinumërimi i votave nga diaspora

10:17 | 31 Tetor 2019

Ende nuk dihet kur do të filloj rinumërimi i rreth 5 mijë fletëvotimeve të ardhura nga Serbia.

Nga Komisioni Qendror i Zgjedhjeve kanë thënë për arbresh.info se fillimisht duhet të bëhet vlerësimi i zarfeve.

Valmir Elezi, zëdhënës i KQZ-së ka thënë gjithashtu se pas këtij porcesi do të dihet numri i fletëvotimëve të aprovuara e më pas numërimi i tyre.

“Para fillimit të numërimit të fletëvotimeve në Qendrën e Numërimit dhe Rezultateve është e nevojshme që të bëhet shqyrtimi dhe vlerësimi i zarfeve të supozuara me fletëvotime. Vlerësimi ka për qëllim që ta dijmë nëse fletëvotimi është dërguar nga një votues i regjistruar suksesshëm si votues jashtë vendit, apo është dërguar nga ndonjë person tjetër që nuk e plotëson këtë kriter të domosdoshëm. Pasi të bëhet ky vlerësim, do ta dijmë saktë se sa është numri i fletëvotimeve të aprovuara dhe sa është i atyre të refuzuara. Në fund, vetëm fletëvotimet e aprovuara numërohen”, ka thënë Elezi.

Ndryshe të mërkurën Gjykata Supreme ka miratuar si të bazuar ankesën e Lëvizjes Vetëvendosje që të ndryshohet vendimi i Panelit Zgjedhor për Ankesa dhe Parashtresa me të cilin ndalohej rinumërimi i 4639 fletëvotimeve të ardhura nga jashtë Kosovës./arbresh.info/

Shpërndaje në rrjete sociale

Lajmet më të lexuara