Drejtori i bordit të ARKEP-it intervistohet nga Komisioni Hetimor për Telekomin

11:21 | 11 Korrik 2019 | Agnesa Çitaku

Të enjten në Komisionin Hetimor Parlamentar në lidhje me gjendjen në PTK dhe Vala në cilësinë e dëshmitarit është intervistuar, Kreshnik Gashi, drejtues i bordit të ARKEP.

Gashi është pyetur se çfarë do të ndodhë me 200 mijë numrat e Telekomit që i shfrytëzon Z-Mobile, pas shkëputjes së kësaj kontrate, shkruan arbresh.info.

“200 mijë numra janë të caktuar për përdorim nga Telekomi, por që përdoren nga operatori virtual Z-Mobile e ka autorizimin e përgjithshëm për shfrytëzim të numeracionit. Nuk është obligim që operatorët të kenë operator virtual”, ka thënë ai.

Gashi ka shtuar se momentalisht ekzistojnë vetëm dy operatorë të plotë.

“Në Kosovë ekzistojnë dy operatorë të plotë, Telekomi dhe Ipko ndërsa për operator të tretë duhet të ketë tender ose ankand”, ka thënë ai.

E deputetja, Albulena Haxhiu ka pyetur nëse është e vërtetë që Z-Mobile tash e disa vite nuk i paguan 27% Telekomit të Kosovës.

Por, Gashi ka deklaruar se nuk ka informacione.

Ndërsa anëtari i këtij komisioni, Haxhi Avdyli ka pyetur se çfarë do të ndodhë nëse vazhdohet kontrata me Z-Mobile e punëtorët realizojnë kërcënimet për largim nga vendet e punës.

Gashi ka shtuar se çështja duhet të realizohet brenda operatorëve dhe vendimi merret pas konsultimit me punëtorët dhe menaxhmentit.

“Nëse Z-Mobile ankohet te ne çështja duhet të zgjidhet me operatorin amë, raportet që ata kanë dhe besoj që edhe punëtorët dhe menaxhmeti bëjnë punë në të mirë të operatorit. Nuk ka ndodhë askund në botë me u ndërpre shërbimi fizik i një operatori, por nuk besoj që kjo çështje do të zgjidhet pa një marrëveshje”, ka thënë Gashi./arbresh.info/

Shpërndaje në rrjete sociale

Lajmet më të lexuara